Татарстанның физик һәм географик торышы

Татарстан Республикасы Көнчыгыш Европа тигезлегенең көнчыгыш өлешендә урнашкан. Гомум мәйданы 68 мең кв.км. Башкаласы – Казан. Россия Федерациясенең сигез регионы: Чувашия республикасы, Марий Эл республикасы, Удмурт республикасы, Башкортстан республикасы, Киров, Ульяновск, Оренбург һәм Самара өлкәләре белән чикләнә. Төп өлеше (90% ка кадәр) диңгез өсте тигезлегеннән якынча 200 метр биеклектә ята. Климаты уртача континенталь: җәен җылы, ә кышын уртача салкын. Гыйнварда уртача температура көньяк-көнбатышта -13,5 тән; төньяк-көнчыгышта -14,5 кә кадәр. Июльдә уртача температура төньяк районнарда +18,6; көньякта + 19,9 га кадәр. Уртача еллык температура +2,2 дән + 3,2 гә кадәр тирбәлә.

Уртача еллык явым-төшемнәр – 450-500 мм. Иң зур елгалары – Идел һәм Кама, шулай ук Каманың кушылдыклары – Нократ һәм Агыйдел. Урманнар республиканың 17% тан күп булмаган өлешен алып тора.

Хәзерге Татарстан – икътисади яктан алга киткән регионнарның берсе, эре фәнни, мәгариф, сәнәгать үзәге. Республикада 3787 мең кеше исәпләнелә. Шәһәр халкы - 75,4%. Татарстан – күпмилләтле республика. Биредә 115 төрле милләт халкы яши. Шуларның күпчелеге татарлар (52,9 %) һәм руслар (39,5 %). Татарстан Республикасы Конституциясе нигезендә, республиканың барлык территориясендә татар һәм рус телләре тигез хокуклы.

Ислам һәм христиан традицион диннәре өстенлек итә, шулай ук католик, яһүд, протестант диннәрен тотучылар да бар.